Fátt virðist geta velt hangikjötinu úr sessi, en það er langalgengasti matur Íslendinga á jóladag. mbl.is/Eyþór

Íslendingar virðast halda fast í hefðir í jólamat á jólum, en tæp 73% hyggjast borða hangikjöt á jóladag. Þetta kom fram í könnun sem MMR framkvæmdi þar sem spurt var hvað yrði á borðum yfir hátíðarnar.

Af þeim sem tóku afstöðu sögðust 52,9% líklegast hafa hamborgarhrygg á aðfangadagskvöld, 9,8% töldu líklegast að þeir myndu borða rjúpu og 8,3% ætluðu að borða kalkún á aðfangadag.

Hangikjötið er aftur á móti algengt á jóladag, en 72,7% landsmanna sögðust líklegast myndu borða hangikjöt og 8% hamborgarhrygg á jóladag.

Svo virðist sem breytileiki í jólamatnum sé aðeins meiri hjá landanum á aðfangadagskvöld en hefðir og venjur ráði ríkjum á jóladag.

Niðurstöðurnar fyrir Ísland voru bornar saman við sambærilega könnun YouGov í Bretlandi dagana 2. - 3. desember 2010.

Þar kom í ljós að breskar matarhefðir hafa vikið nær alfarið fyrir bandarískum áhrifum, en 56% Breta segjast ætla að hafa kalkún í matinn á jóladag í ár. Kalkúnninn bandaríski kemur því í staðinn fyrir jólagæsina sem Bretar neyttu áður fyrr á jólum,  en 2% bresku þjóðarinnar sögðust ætla að borða gæs á jóladag í ár.