Ánægðir með veðrið en síður með fjármálin

Íslendingar eru almennt ánægðir með veðrið, vinnuna og nágranna sína, samkvæmt nýrri könnun MMR. Hins vegar eru margir ekki jafn ánægðir með fjárhagsstöðu sína.

Mikill meirihluti eða 93,4% landsmanna segjast ánægð með nágranna sína, 90,3% segjast ánægð með vinnuna sína og 85,5% eru ánægð með veðrið að undanförnu.

Það hafa því ekki orðið miklar breytingar frá könnun MMR í ágúst 2010 þegar ánægja landsmanna með sumarveðrið, vinnu og nágranna var einnig mæld. Þá sögðust 94,7% ánægð með veðrið í sumar, 92,9% voru ánægð með nágranna sína og 91,4% með vinnuna sína. Það bendir því flest til þess að þrátt fyrir slæmar veðurspár á köflum þá séu Íslendingar yfirleitt ánægðir með veðrið á Íslandi.

Það eina sem landsmenn eru ekki ánægðir með, af þeim atriðum sem MMR kannaði, er fjárhagsstaða sín en rétt tæpur helmingur þátttakenda eða 49% segjast óánægð með fjárhagsstöðu sína, segir í tilkynningu.

Sjá nánar hér

• 1 blogg um fréttina

Bloggað um fréttina

• Haraldur Haraldsson: Ánægðir með veðrið en síður með fjármálin/skal þessi könnun MMR. …