Málflutningur Seðlabankans fyrir neðan allar hellur

Sigmundur Davíð Gunnlaugsson, formaður Framsóknarflokksins.
Sigmundur Davíð Gunnlaugsson, formaður Framsóknarflokksins. mbl.is

Sigmundur Davíð Gunnlaugsson, formaður Framsóknarflokksins, segir yfirlýsingu Seðlabankans vegna stýrivaxtaákvörðunar í gær fyrir neðan allar hellur. Þar segir meðal annars að hætta sé á frekari veikingu krónunnar og hægari hagvexti vegna niðurstöðu Icesave-atkvæðagreiðslunnar.

Bandaríska viðskiptablaðið Wall Street Journal greinir frá tilkynningu Seðlabankans í vefútgáfu sinni.

„Þetta finnst mér fyrir neðan allar hellur, að fulltrúi Seðlabankans skuli tala með þessum hætti. Yfirleitt eru seðlabankastjórar, og þeir sem tala fyrir hönd seðlabanka, alveg sérstaklega varfærnir og passa hvert einasta orð sem þeir segja, vegna þess að ummæli sem koma frá seðlabanka hafa áhrif á markaðinn,“ segir Sigmundur.

„Þrátt fyrir að enginn af spádómum þeirra hafi gengið eftir nú, frekar en áður, er nánast eins og þeir séu að reyna að fá ófaraspárnar sínar til að rætast,“ bætir hann við.  „Því auðvitað hefur það neikvæð áhrif, þegar það kemur frá Seðlabankanum.“

Tilkynningin frá Seðlabankanum var gefin út í gærmorgun, áður en lánshæfismatsfyrirtækið Moody's tilkynnti að lánshæfiseinkunn Íslands héldist óbreytt. Hún er nú Baa3, sem er sú lægsta sem hægt er að fá án þess að lenda í ruslflokki. Sigmundur segir þetta Seðlabankanum síður en svo til málsbóta.

„Það er í rauninni ennþá verra að þeir skuli hafa sent þetta frá sér áður en niðurstaðan var komin frá Moody's, vegna þess að í þessu eru fólgin skilaboð til Moody's og annarra lánshæfismatsfyrirtækja. Þegar Seðlabankinn telur að eðlileg afleiðing af þessari niðurstöðu sé að lánshæfismat versni, nú þá eru það mjög sterk skilaboð til lánshæfismatsfyrirtækjanna. Það er í rauninni merkilegt að þetta skuli hafa haldist uppi þrátt fyrir þetta mat hjá Seðlabankanum,“ segir Sigmundur.

Í Morgunblaðinu í dag fagnar Steingrímur J. Sigfússon, fjármálaráðherra, ákvörðun Moody's og því að tekist hafi að verjast því að mat íslenska ríkisins lækkaði. Árni Páll Árnason, efnahags- og viðskiptaráðherra, tekur í sama streng.

Sigmundur tekur undir það að vissulega sé ákvörðun Moody's góðar fréttir. Hins vegar sé rétt að spyrja hvers vegna ráðherrar hafi ekki haldið uppi þeim vörnum, sem þeir hafa gert í kjölfar kosninganna, undanfarin tvö ár.

mbl.is
Fleira áhugavert
Fleira áhugavert