Sautján ára piltur var staðinn að hraðakstri í Ártúnsbrekku í gærkvöld en bíll hans mældist þar á 157 km hraða.
Að sögn lögreglunnar á pilturinn yfir höfði sér háa sekt og ökuleyfissviptingu og fái hann því ágætan tíma til að hugsa ráð sitt. Ekki virðist vera vanþörf á því þrátt fyrir ungan aldur hafi pilturinn áður verið tekinn fyrir hraðakstur.
Samkvæmt sektarreikni Umferðarstofu á ökumaðurinn ungi von á sekt upp á 150 þúsund krónur, að missa ökuleyfið í 3 mánuði og einnig fær hann fá 3 refsipunkta í ökuferilsskrá.
Þar sem pilturinn er handhafi bráðabirgðaskírteinis verður hann jafnframt settur í ótímabundið akstursbann. Ökuskírteinið fær hann ekki aftur fyrr en hann hefur sótt sérstakt námskeið og tekið ökuprófið að nýju.