Dómstóla en ekki ríkisendurskoðanda að kveða upp dóm

Haraldur Johannessen ríkislögreglustjóri hefur sent innanríkisráðherra, Ögmundi Jónassyni, greinargerð vegna innkaupa embættisins, sem ríkisendurskoðandi, Sveinn Arason, hafði gert athugasemdir við og talið lögbrot.

Haraldur segir í svari við fyrirspurn Morgunblaðsins að í greinargerðinni sé sýnt fram á að embættið hafi farið að lögum við innkaupin. Sú reglugerð sem ríkisendurskoðandi hafi miðað við hafi ekki tekið gildi fyrr en ári eftir innkaupin.

Í umfjöllun um mál þetta í Morgunblaðinu í dag segist Haraldur í greinargerðinni vekja athygli ráðherra á þeirri spurningu hvort ríkisendurskoðandi, Sveinn Arason, hafi gengið of langt í fjölmiðlum með yfirlýsingum um lögbrot embættis ríkislögreglustjóra. Það sé dómstóla en ekki ríkisendurskoðanda að kveða upp dóm um hvort farið hafi verið að lögum.