mbl.is/Árni Sæberg

Rúmlega 46% þeirra sem tóku þátt í nýrri könnun MMR eru byrjuð að kaupa jólagjafirnar í ár.

MMR kannaði hvort fólk væri byrjað að kaupa jólagjafir fyrir jólin í ár. Af þeim sem tóku afstöðu sagðist 46,1% vera byrjað að versla inn jólagjafir fyrir jólin í ár. Meirihluti er þó ekki byrjaður að versla jólagjafir eða 53,9%.

Könnunin var framkvæmd dagana 10.-14. nóvember 2011 og var heildarfjöldi svarenda 879 einstaklingar.

Samkvæmt könnuninni var nokkur munur á því hvort fólk væri byrjað að kaupa jólagjafir fyrir jólin í ár eftir aldri, tekjum og sérstaklega eftir kyni.

Af þeim sem tóku afstöðu voru konur í nokkrum meirihluta þeirra sem voru byrjaðir að kaupa jólagjafir eða 56,8% kvenna borið saman við 35,3% karla.

Einnig var nokkur munur milli tekjuhópa þar sem tekjuhæstu heimilin og heimili með tekjur á bilinu 250-399 þúsund á mánuði voru helst byrjuð jólagjafainnkaupin. Þannig voru 52,7% tekjuhæsta hópsins og 51,2% hópsins með heimilistekjur á bilinu 250-300 þúsund krónur á mánuði byrjuð jólagjafainnkaup þetta árið borið saman við 40,2% þeirra sem voru með undir 250 þúsund krónum í heimilistekjur á mánuði.

Breytilegt var milli aldurshópa hvort fólk væri byrjað á jólagjafainnkaupum. Rúmlega helmingur aldurshópsins 30-49 ára var byrjaður jólagjafainnkaup eða 50,9%, borið saman við 44,8% fólks í elsta aldurshópnum (50-67 ára) og 39,9% yngsta aldurshópsins (19-29 ára). Lítill munur var á því hvort fólk var byrjað að kaupa jólagjafir eftir stjórnmálaskoðunum.

Sjá nánar hér