Þrjú útköll í nótt

Björgunarsveitir Slysavarnafélagsins Landsbjargar voru kallaðar út þrívegis í nótt til aðstoðar. Mikið hefur verið um slíkar beiðnir síðustu daga og má þær í flestum tilvikum rekja til rysjóttar veðráttu.

Í nótt fóru björgunarsveitarmenn af höfuðborgarsvæðinu á Nesjavallaleið en þar hafði fólk fest bíl sinn í snjó. Vel gekk að leysa úr því og koma fólkinu til byggða. Þá fóru liðsmenn björgunarsveitarinnar Brimrúnar á Eskifirði upp í Oddsskarð þar sem Skoda-bíll var fastur í skafli og fimm manns sem í bílnum voru komust hvorki lönd né strönd.

Þá var bátur að losna upp í Sandgerðishöfn. Vel fór hins vegar í því máli og liðsmenn Sigurvonar bundu bátinn tryggilega við bryggju.

Vegagerðin segir að óveður sé á Austfjörðum og með norðausturströnd landsins. Eru vegir víðast hvar flughálir og í raun er ekkert ferðaveður.

Nánar um færð á vegum á vef Vegagerðarinnar.

• 1 blogg um fréttina

Bloggað um fréttina

• Sigmar Þór Sveinbjörnsson: Munum eftir góðum verkum Björgunarsveitanna