Erlendir ferðamenn í Reykjavík. mbl.is/Golli

Áætlað er að ríflega 4.000 ferðamenn heimsæki Reykjavík nú um áramótin sem er fjölgun frá því í fyrra að sögn Höfuðborgarstofu. Talið er að um 3.500 ferðamenn hafi sótt borgina heim á síðasta ári.

Fram kemur í tilkynningu að ferðamenn í borginni gisti að stærstum hluta á hótelum borgarinnar en farfuglaheimili og gistiheimili séu einnig vel bókuð. Að sögn starfsfólks Upplýsingamiðstöðvar ferðamanna í Reykjavík vilja ferðamennirnir gera vel við sig í mat og drykk auk þess sem þeir fara á söfn og heimsækja sundlaugar borgarinnar.

Hallgrímskirkja sé sem fyrr vinsæl meðal ferðamanna en Harpa, nýjasta kennileiti borgarinnar, njóti einnig mikilla vinsælda. Bæði þykir byggingin sjálf vera áhugaverð en einnig sé mikill áhugi á tónlistarviðburðum í húsinu.

Þá segir að margir ferðamenn séu óragir við að leigja bíla og ferðast á eigin vegum þrátt fyrir gríðarlegt fannfergi og nokkuð áberandi sé að sumir óski eftir að upplifa ævintýri í bland við náttúruskoðun á sínum ferðum. Sem fyrr séu ferðir í Bláa lónið og um Gullna hringinn vinsælastar en Fontana á Laugarvatni sé áfangastaður sem njóti sívaxandi vinsælda á vetrarferðum fólks um landið.

Flestir ferðamenn hafi heyrt af fjörugum áramótum í Reykjavík og mikilli sprengigleði borgarbúa og vilji taka þátt í þeirri gleði. Fjölmörg hótel og ferðaskrifstofur bjóði upp á sérstakar rútuferðir á áramótabrennur borgarinnar og njóti mikilla vinsælda.

„Það er ekki alveg einfalt að meta fjölda ferðamanna um áramót en bæði Icelandair og Iceland Express segja að töluverð fjölgun flugfarþega hafi verið um þessi áramót en hluti af þeirri af þeirri  fjölgun má rekja til Íslendinga sem búsettir eru erlendis og fagna jólum og áramótum með fjölskyldu hérlendis. Ljóst er þó að þessi mikla farþegafjölgun nær einnig til erlendra ferðamanna.  Óformleg talning á hótelum borgarinnar  bendir til þess að hér dvelji ríflega 4.000 manns yfir áramót.  Talið er að um 1.500 manns hafi dvalið hér yfir jólin,“ segir í tilkynningu frá Höfuðborgarstofu.