mbl.is/Ómar

Búið er að loka Hellisheiðinni um óákveðinn tíma að sögn Vegagerðarinnar.

Ábendingar frá veðurfræðingi

„Veður fer versnandi þegar líður á morguninn suðvestan- og vestanlands, einkum á fjallvegum. Í byggð hlánar hins vegar smámsaman.  Á Hellisheiði og í Þrengslum er nú fyrir hádegi búist við vaxandi hríðarkófi með lélegu skyggni og talsverður skafrenningur verður á Reykjanesbraut fram undir hádegi,“ segir í tilkynningu.

Færð og aðstæður

Búið er að loka Hellisheiði um óákveðinn tíma en snjóþekja og snjókoma er á Sandskeiði og hálka í Þrengslum. Flestar aðalleiðir á  Suðurlandi eru færar þó er og víða þungfært á fáfarnari sveitavegum. Enn er ófært á Mosfellsheiði og Lyngdalsheiði en unnið að hreinsun.

Hálka er á Reykjanesbraut og  Suðurnesjum. Á Vatnsleysuströnd er þæfingur en unnið að hreinsun. Ófært er á Suðurstrandavegi.

Á Vesturlandi er víðast hvar hálka. Ófært er á Útnesvegi og í Álftafirði.

Á Vestfjörðum er ófært frá Vatnsfirði og austur yfir Klettsháls en unnið að hreinsun.  Í Djúpinu er þæfingsfærð og aðeins fært á fjórhjóladrifsbílum en áfram er unnið að hreinsun. Þæfingsfærð er  einnig í Súgandafirði og unnið að hreinsun.  Flughált er í Bæjarhreppi.

Á Norðurlandi er víðast hvar hálka eða snjóþekja.  Siglufjarðarvegur er ófær.

Hálka eða snjóþekja er á flestum vegum á Austurlandi  og Suðausturlandi.