Þær konur, sem eru með PIP-púða í brjóstum sínum, geta ekki fengið nýja púða um leið og PIP-púðarnir verða fjarlægðir Reuters

Anna Lilja Þórisdóttir
annalilja@mbl.is

Þær konur, sem eru með PIP-púða í brjóstum sínum, geta ekki fengið nýja púða um leið og PIP-púðarnir verða fjarlægðir Ekki er talið óhætt að setja strax nýja púða þar sem þeir leku gætu hafa ert vefi í líkama kvennanna. Þetta segir sviðsstjóri hjá Landlæknisembættinu.

„Fyrstu tölur frá Krabbameinsfélaginu, sem sér um ómskoðun þessara kvenna, benda til þess að margar kvennanna virðist vera með leka púða,“ segir Anna Björg Aradóttir, sviðsstjóri eftirlits og gæða hjá Landlæknisembættinu.  

„Læknisfræðilegt mat bendir til þess að þessir leku púðar erti meira en aðrir og því er alls ekki ráðlegt að setja nýja púða strax. Konurnar verða að bíða á milli aðgerða, ef þær kjósa að fá nýja púða.“

Anna Björg segir að ekki sé hægt að segja til um hversu langur sá tími gæti verið, það sé persónubundið, væntanlega hafi púðarnir lekið mismikið og konurnar misviðkvæmar fyrir ertingu. „Það sést í rauninni ekki fyrr en í aðgerðinni, þegar púðarnir verða fjarlægðir, hvernig þetta lítur út.“

Anna Björg segir að hugsanlega gætu einhverjar konur, sem nú bera PIP-púða, ekki hafa orðið fyrir neinni ertingu og gætu þá jafnvel fengið nýja púða í sömu aðgerð og hinir verða fjarlægðir í. 

„En það verður ekki gert á Landspítalanum. Tilboð ríkisins hljómar upp á að láta fjarlægja púðana þar, ekkert annað. Konur geta auðvitað látið fjarlægja púðana á eigin kostnað hjá lýtalækni og ef hans mat er að setja megi nýja púða í brjóstin í sömu aðgerð, þá er það hans læknisfræðilega mat og á faglega ábyrgð viðkomandi læknis.“