Örn Bárður Jónsson, prestur og fyrrverandi fulltrúi í stjórnlagaráði.

Hjörtur J. Guðmundsson
hjorturj@mbl.is

„Ég gerði mér vonir um að Alþingi færi rækilega yfir þessar tillögur og skrifaði síðan um þær álit. Ég gerði hins vegar alveg eins ráð fyrir því að hópurinn yrði kallaður saman til skrafs og ráðagerða,“ segir Örn Bárður Jónsson, prestur og einn fulltrúa í stjórnlagaráði, um þá ákvörðun þingsins í gær að vísa frumvarpi stjórnlagaráðs að nýrri stjórnarskrá aftur til ráðsins til umfjöllunar á fundi sem fram á að fara 8. - 11. mars næstkomandi.

Örn segist gera sér grein fyrir því að Alþingi glími við mörg verkefni en að það komi honum á óvart að ekki skuli liggja fyrir efnisleg niðurstaða af hálfu þingsins um frumvarpið á þeim sjö mánuðum sem liðið hafi frá því að stjórnlagaráð lauk störfum sínum. Hann minnir á í því sambandi að ráðið hafi lokið við frumvarpið og náð samkomulagi um það á tæpum fjórum mánuðum.

„Ég geri ekki ráð fyrir að komast á fundinn vegna annarra skyldustarfa og anna, þetta er ekki mikill fyrirvari, en vonandi komast þá hin og geta komið sínum sjónarmiðum á framfæri. En það er auðvitað komið að því að Alþingi sýni nú dug og klári þetta mál og í raun og veru þykir mér málflutningur þeirra sem eru á móti þessu frumvarpi eða stjórnarskrárbreytingum yfir höfuð séu fulltrúar ekki bara íhaldssemi heldur afturhalds,“ segir Örn Bárður.

Hann gefur lítið fyrir umræðuhefðina á Alþingi og segir hana ekki skila uppbyggilegum niðurstöðum. „Mér finnst Alþingi í dag ekki sýna þjóðinni þá virðingu og fordæmi sem það ætti að gera og í raun og veru er komið að því að það þarf að hreinsa út úr þessu stjórnkerfi bara algerlega. Mér finnst að það þurfi bara að sópa til. Það þarf ekki bara nýtt fólk heldur ný vinnubrögð og nýjan hugsunarhátt. Ný viðhorf og alveg nýjan anda.“

Jóhanna Sigurðardóttir, forsætisráðherra, lýsti því yfir á Alþingi fyrr í dag að hún vonaði að sem flestir sem sæti áttu í stjórnlagaráði sæju sér fært að mæta á fund ráðsins sem boðaður hefur verið í næsta mánuði, en auk Arnar Bárðar hafa bæði Salvör Nordal, sem gegndi formennsku í stjórnlagaráði, og Pawel Bartoszek, sem sæti átti í ráðinu, lýst því yfir að þau muni ekki sitja fundinn.