Of naumt skammtað til reiðvega

Árlega eru veittar um 60 milljónir króna til viðhalds og nýlagningar reiðvega hér á landi. Hestamönnum finnst allt of hægt ganga því reiðvegir eru mikilvægir til þess að hægt sé að ganga betur um náttúru Íslands og draga úr umferð ríðandi fólks um þjóðvegi. Miðað við verkefni hestamannafélaganna þyrfti að margfalda þessa fjárhæð.

Samgöngunefnd Landssambands hestamannafélaga mun á þessu ári í fyrsta skipti taka frá fé og nota í lagfæringar á fjölförnum ferðaleiðum áður en reiðvegafénu er úthlutað til verkefna félaganna. Þar er meðal annars hugað að leiðinni vestur Mýrar, á Löngufjörur.