Innlent | mbl | 3.5.2012 | 11:00

Laun stjórnenda hækkuðu mest

Laun á almennum markaði hafa ekki hækkað í samræmi við verðbólguþróun í landinu mbl.is/Golli

Laun á almennum vinnumarkaði hækkuðu að meðaltali um 4,3% milli áranna 2010 og 2011. Sú hækkun er í takt við kjarasamninga en heldur ekki í við verðbólgu, sem var 5,6% á sama tíma.

Þá sýna niðurstöðurnar að tekjur æðstu stjórnenda fyrirtækja hækkuðu nokkru meira en tekjur annarra hópa á tímabilinu. Laun æðstu stjórnenda hækkuðu um 9,9%, laun millistjórnenda um 8,3% en tekjur annarra hópa hækkuðu um 1-7%. Þetta er niðurstaða launagreiningar PwC fyrir árið 2011.

Samkvæmt greiningunni voru föst mánaðarlaun á Íslandi 463 þúsund krónur að meðaltali en heildarlaun voru að meðaltali 513 þúsund krónur á mánuði.

Laun farin að hækka á ný eftir lækkun í kjölfar hrunsins

Tekjur stjórnenda fyrirtækja og stofnana hækkuðu nokkru meira en tekjur annarra hópa milli áranna 2010 og 2011. Þannig hækkuðu laun æðstu stjórnenda (forstjóra og framkvæmdastjóra) um 9,9% og laun millistjórnenda um 8,3%. Aðrir hópar hækkuðu minna eða á bilinu 1-7%.

„Niðurstöður Launagreiningar PwC sýna að tekjur hópa, sem lækkuðu tímabundið eftir efnahagshrun, eru farnar að hækka á nýjan leik. Launaþróun ólíkra hópa er æði misjöfn og sömu sögu er að segja um hlutföll fastra launa og aukagreiðslna í heildarlaunum.

Greind voru laun eftir 94 starfsheitum og kemur m.a. í ljós að fjórðungur launa fólks í ósérhæfðum störfum eru í formi aukagreiðslna ofan á föst laun. Iðnaðarmenn eru einnig með hátt hlutfall aukagreiðslna ofan á föst laun eða um fimmtung. Flestir hópar byggja laun sín að mestu á föstum launum og eru aðeins með um 3-6% af aukagreiðslum í heildarlaunum sínum,“ segir í tilkynningu.

Í ofangreindum tölum yfir föst laun er miðað við grunnlaun og fastar aukagreiðslur einstaklinga. Heildarlaun eru föst laun að viðbættum breytilegum aukagreiðslum s.s. greiðslum fyrir unna yfirvinnu, akstur skv. akstursdagbók, álagsgreiðslur, bónusgreiðslur o.s.frv.

Launagreining PwC er unnin árlega og miðast við laun í septembermánuði hvers árs. Gögnin sem liggja að baki greiningunni eru fengin milliliðalaust úr launakerfum fyrirtækja og stofnana. Greiningin byggir á raungögnum en ekki á könnunum eða svörum vinnuveitenda eða launþega.

Launagreining PwC 2011 byggir á upplýsingum um laun 15.000 einstaklinga og gefur því greinargóða og raunsanna mynd af stöðu og þróun markaðslauna á Íslandi, segir í tilkynningu frá PwC.