Samstaða krefst afnáms verðtryggingar

Stjórn Samstöðu, flokks lýðræðis og velferðar, krefst þess að strax verði hafist handa við afnám verðtryggingar. Samhliða fari fram 20% leiðrétting á fasteignalánum til að koma í veg fyrir að fjölmörg heimili fari í þrot á næstu misserum vegna viðvarandi verðbólgu.

Þetta kemur fram í yfirlýsingu frá stjórninni.

Þar segir að almenn niðurfærsla dragi úr útlánatapi banka og Íbúðalánasjóðs og auki eftirspurn í samfélaginu.

Bent er á tvær leiðir til að fjármagna leiðréttinguna. „Önnur felst í útgáfu skuldabréfs sem greitt verður niður með skatti á hagnað banka og hin í upptöku nýkrónu á mismunandi gengi til að færa niður höfuðstól fasteignalána.“

„Skuldsett heimili geta ekki tekið að sér að fjármagna skuldbindingar lífeyrissjóða. Hætta verður skattlagningu á útgreiðslur úr lífeyrissjóðum og taka upp skatt á inngreiðslur til að fjármagna m.a. lífeyri úr almannatryggingakerfinu sem dugar til framfærslu,“ segir í yfirlýsingunni.

Stjórn Samstöðu telur að skuldavandinn verði ekki leystur nema gripið verði til almennrar leiðréttingar til viðbótar við sértæk úrræði ríkisstjórnarinnar sem eru „tímafrek og dýr“. 

• 1 blogg um fréttina

Bloggað um fréttina

• Magnús Helgi Björgvinsson: Ég hata verðtryggingu! En þoli ekki svona ábyrgðalaust hjal.