Nýr Landspítali verði opinber framkvæmd

Lagt er til að bygging nýs Landspítala við Hringbraut verði hefðbundin opinber ríkisframkvæmd og horfið verði frá svokallaðri leiguleið sem fyrirhugað var að fara, að því er fram kemur í minnisblaði sem fjármála- og efnahagsráðherra og velferðarráðherra lögðu fram á ríkisstjórnarfundi í morgun. 

Ráðherrarnir leggja til að undirbúið verði frumvarp um breytingar á lögum sem geri opinberu hlutafélagi um byggingu nýs Landspítala (NLSH ohf.) kleift að halda utan um og annast byggingu nýs Landspítala sem fjármagnaður yrði sem opinber framkvæmd að mestu eða öllu leyti. Frumvarpið yrði lagt fram í janúar.

Verði frumvarpið samþykkt og að öðrum skilyrðum uppfylltum yrði þá mögulegt að auglýsa forval framkvæmdanna með hefðbundnum fyrirvara um samþykki Alþingis, samkvæmt því sem fram kemur í fréttatilkynningu frá NLSH.

Samkvæmt leiguleiðinni átti einkaaðili að byggja og reka húsnæðið og leigja það til ríkisins til langs tíma. Fram hafa komið veigamiklar efasemdir um hvort bygging spítalans uppfylli nauðsynleg frumskilyrði sem þurfa að vera fyrir hendi þegar leiguleiðin er farin, að því er segir í minnisblaðinu. 

Hagkvæmara að ríkið sjái um bygginguna

„Talið er að hinn innlendi verktakamarkaður hafi varla burði til að fjármagna stærstu verkþættina og bera á þeim fjárhagslega ábyrgð á grundvelli langtímaleigusamnings en eitt frumskilyrði fyrir leiguleiðinni er að áhættan af kostnaði við byggingu og rekstur sé hjá þeim einkaaðila sem byggir og annast rekstur húsnæðisins.“

Í minnisblaðinu segir að jafnvel þótt fram kæmu tilboð í uppbyggingu og fjármögnun í samræmi við leiguleið séu miklar líkur á því að bókhaldsreglur ríkisins mæli svo fyrir um að heildarskuldbinding ríkisins færðist eftir sem áður á bækur ríkisins. Þegar svo er verði að ætla að eðlilegra og hagkvæmara sé að ríkið sjái þá sjálft um byggingu spítalans í hefðbundinni opinberri framkvæmd. 

Til stendur að afgreiða tillögu að deiliskipulagi nýs Landspítala úr skipulagsráði Reykjavíkurborgar á mánudaginn.

Vinningstillaga SPITAL, módelmynd af 1. áfanga Nýs Landspítala við Hringbraut. Ljósmynd/Hreinn Magnússon

• 2 blogg um fréttina

Bloggað um fréttina

• Ásgrímur Hartmannsson: Á þá ekkert að halda gamla spítalanum við?
• Haraldur Haraldsson: Landspítali verði opinber framkvæmd//Auðvitað þegar hann verður bygður!!