Þyrlurnar klárar í vikulokin

„Það er útlit fyrir að báðar þyrlurnar verði klárar seinni partinn í vikunni,“ sagði Ásgrímur Ásgrímsson hjá Landhelgisgæslunni spurður að því hvenær búast mætti við að þyrlurnar TF-LIF og TF-GNA yrðu tilbúnar til notkunar á ný.

TF-LIF hefur verið í reglubundinni skoðun. Þeirri skoðun var flýtt sem kostur var eftir að TF-GNA var nauðlent við bæinn Kvísker í Öræfum 25. apríl síðastliðinn.

„Það sem ég heyrði á flugvirkjanum í dag var að bilunin væri ekki eins mikil og talið var og ekki eins mikið sem hafi þurft að skipta um. Þeir varahlutir sem vantaði yrðu komnir til landsins í vikunni,“ sagði Ásgrímur um viðgerðina á TF-GNA, en nauðlendingin var vegna bilunar í gírkassa þyrlunnar.

TF-GNA hífð á flutningabíl við Kvísker í Öræfum þaðan sem hún var flutt til Reykjavíkur. Ljósmynd/Landhelgisgæslan

• 1 blogg um fréttina

Bloggað um fréttina

• Sigmar Þór Sveinbjörnsson: Gott að fá þyrlurnar í gagnið