Normcore er nýjasta nýtt í tískuorðabókinni. Orðið lýsir stíl þess sem velur öruggu leiðina í fatavali, er eintóna og tilbreytingarlaus. Hann er ekki djarfur eða töff, hann er venjulegur.
Orðið normcore hefur komið víða við í tískublöðum, eftir að tískuspekúlantar hjá bandaríska fyrirtækinu K-Hole nefndu það fyrst og tímaritið New York birti það á síðum sínum í kjölfarið.
Hugmyndin með normcore virðist vera sú að á tímum þar tískuheimurinn hampar öllu því sem er einstakt og sérvitringslegt, þá sé síðasta vígið til að vera frumlegur falið í því að klæðast eins og argasti meðal Jón.
Segja má að með normcore nái flækjustig tískuheimsins nýjum hæðum, þar sem hinn tískumeðvitaði töffari leggur sig í líma við að líta út fyrir að vera alls ekkert meðvitaður um eigin fatastíl eða annarra.
Á sama tíma er hættan sú að þú hrósir einhverjum fyrir að vera töff og með á nótunum, þegar viðkomandi er í raun og veru fullkomlega ómeðvitaður um að hinn tilþrifalausi fatastílll hans sé í samræmi við nýjustu tískubylgjur.
En hvernig á að ná fram þessum normcore stíl án þess að vera tilgerðarlegur eða afhjúpa sig sem tískumeðvitaðan? Tískublaðamenn breska blaðsins Independent kynntu sér málið. Þeir segja að normcore stíllinn geti til dæmis falist í gráum buxum, teygðri tíglapeysu og íþróttaskóm með engu merki á.
Með öðrum orðum, segir Independent, þá felst normcore í því að klæða þig eins og geðgóður geðsjúklingur, nú eða þá ráðvilltur íslenskur skiptinemi árið 1984. Góðar fyrirmyndir það.