Ökumaður missti stjórn á bifreið sinni við Vatnsnes í Húnavatnssýslu á fjórða tímanum í gær með þeim afleiðingum að bifreiðin valt. Ökumaðurinn hafði sveigt bílinn snöggt til hliðar vegna kindar sem hljóp upp á veginn.
Tveir erlendir ferðamenn voru í bílnum og sluppu þau með minniháttar skrámur en voru í töluverðu áfalli að sögn Þrastar Guðlaugssonar sem var fyrstur á vettvang og aðstoðaði fólkið úr bílnum. Sjúkralið og lögregla frá Blönduósi komu á staðinn hálftíma síðar.
Bíllinn fór eina og hálfa veltu á veginum sem loka þurfti í kjölfarið.
Að sögn lögreglunnar á Blönduósi voru ökumaðurinn og farþeginn flutt á sjúkrahús til nánari skoðunar en útskrifuð skömmu síðar.
Þyrla Landhelgisgæslunnar hafði verið við selatalningar á Vatnsnesi og ákváðu flugmenn hennar að lenda á veginum og athuga aðstæður.
Þröstur Guðlaugsson tók myndir á vettvangi.