„Við vorum að skoða virki frá tíma breska heimsveldisins í Lucknow þegar við allt í einu löbbuðum inn á kvikmyndasett þar sem er verið að taka upp fáránlegt dansatriði. Ég tók eftir því að nokkrir í tökuliðinu virtust mjög spenntir yfir nærveru okkar. Svo kom aðstoðarleikstjórinn til okkar og spurði hvort okkur langaði að vera aukaleikarar í einu atriði í myndinni.“
Þetta segir Friðrik Guðmundsson, en skömmu eftir þessa atburði voru hann og ferðafélagi hans Hrafnkell Hringur Helgason klæddir sem breskir hermenn, umkringdir af myndavélum og leikurum í tökum á nýjustu kvikmynd leikstjórans Muzaffar Ali. Þeir höfðu ákveðið að fara í allsherjar reisu allt frá Norður-Nepal til Suður-Srí Lanka og hafa verið á ferðinni síðan í maí.
„Við höfðum ekkert sérstakt plan fyrir ferðina þannig við ákváðum að slá til,“ segja þeir í samtali við mbl.is, en tökur á myndinni fóru fram í indversku höfuðborginni. „Við vorum svo spenntir yfir þessu að við hoppuðum bara upp í lest beint til Delí í tökur,“ segja þeir.
„Við vissum nákvæmlega ekkert um myndina fyrr en einn af aukaleikurunum á settinu sagði okkur frá henni.“ Um var að ræða myndina Raqs sem kemur út í janúar. Hún gerist á 19. öld á tímabilinu sem Bretar eru að taka yfir gömlu konungsveldin í Norður-Indlandi. Strákarnir voru alls sextán tíma við tökur. Þeir lýsa andrúmsloftinu sem spennuþrungnu og ærslafullu, enda meira en hundrað manns við störf í kringum þá og margir að freista framans í kvikmyndaheiminum af fullri alvöru.
„Í senunni okkar eru allir aðalleikararnir. Sykursæti ungi aðalsmaðurinn hlýtur heiðursorðu frá breska kónginum og drottningunni fyrir vel unnin störf. Við Frikki erum þar í þjónustustörfum og færi ég til dæmis kónginum orðuna,“ segir Hrafnkell Hringur. „Ég geng jafnvel svo langt að segja að við kóngsi höfðum byggt upp ákveðna kemistríu þegar líða tók á tökurnar.“
Nú eru ferðalangarnir staddir í Tyrklandi og fara bráðum að leggja leið sína heim. „Við erum að enduraðlagast vestrænni menningu í forgarði helvítis, Antalya á Tyrklandi.“ Friðrik ætlar í tónsmíðanám við Listaháskólann í haust og ætlar sér að verða kvikmyndatónskáld. Hringur fer í listfræði og mun sækja um á sviðshöfundabraut í LHÍ næsta vor. Báðir voru þeir hneigðir til leiklistar á menntaskólaárum sínum en aðspurðir segjast þeir ekki sækjast eftir frekari frama í Bollywood-heiminum.
„Ég sakna margra vina, en mest kannski hundanna minna, sem ég ætla mér að kúra með í sjö nætur eftir að ég kem,“ segir Hrafnkell og hlær.