Kolbeinn Árnason, framkvæmdastjóri LÍU, er ánægður með niðurstöður sameiginlegs makríl-leiðangurs Færeyinga, Íslendinga, Norðmanna og Grænlendinga í júlí og ágúst. Niðurstöður leiðangurins leiddu í ljós að innan íslenskrar efnahagslögsögu væru 1,6 milljón tonn, eða 18%, af heildarvísitölu makríls í Norðaustur-Atlantshafi sem er um 9 milljón tonn. Er því um mikla markrílgengd að ræða í íslenskri lögsögu.
Markmið leiðangurins var að kortleggja útbreiðslu og magn makríls og annarra fiskistofna í Norðaustur-Atlantshafi á meðan á ætisgöngum þeirra um norðurhöf stendur, auk þess sem kannað var ástand sjávar og átustofna á svæðinu.
Kolbeinn segir það bæði gott að stofninn sé í góðu standi og að hann skuli halda sig innan íslenskrar lögsögu enn eitt árið. „Það eru engin merki um það að hann sé á förum,“ segir Kolbeinn.
Kolbeinn segir menn þurfa að stíga varlega til jarðar og nýta aflann skynsamlega. „Sú fjárfesting sem menn hafa lagt í og sú kunnátta sem menn hafa aflað sér við veiðarnar munu nýtast áfram. Vonandi verður það áfram undirstaða að góðu gengi í greininni svo hún geti skilað tekjum til samfélagsins,“ segir Kolbeinn.
Frekari viðræður eru fyrirhugaðar í haust og sagði Sigurður Ingi Jóhannsson sjávarútvegsráðherra, í samtali við Morgunblaðið, stöðu Íslands styrkjast fyrir þeim málflutningi sem Ísland hefur haft.
Þessu er Kolbeinn sammála og segir hann niðurstöður leiðangursins réttlæta kröfu Íslands um stóra hlutdeild í stofninum. „Þetta rennur stoðum undir það sem við höfum verið að segja um að það verði að taka tillit til þess að við höfum stóra hlutdeild í þessum stofni,“ segir Kolbeinn.
Tímasetning fyrirhugaðra viðræðna er enn óljós.