Ekki mælt með minni sameiningum

Helst er mælt með sameiningu Dalabyggðar við nágrannasveitarfélög í skýrslu um sameiningarkosti á Vesturlandi sem gerð hefur verið fyrir Samtök sveitarfélaga á Vesturlandi og kynnt var á aðalfundi samtakanna í Búðardal í gær.

Sameining allra sveitarfélaga á Snæfellsnesi kemur einnig ágætlega út. Sísti kosturinn er sameining lítilla sveitahreppa við stóru byggðakjarnana, að því er fram kemur í Morgunblaðinu í dag.

Mælt er með sameiningu Dalabyggðar við Reykhólasveit og Strandabyggð og þar næst með sameiningu allra sveitarfélaganna á Snæfellsnesi. Sameining allra sveitarfélaga í Borgarfirði og Akraness, svokölluð Akraborg, er talinn síðri valkostur þó ávinningur gæti orðið allnokkur.