Um 40% af fasteignum í eigu Íbúðalánasjóðs (ÍLS) eru á Suðurnesjum, en sjóðurinn átti 831 fasteign þar í lok síðasta mánaðar. Samband sveitarfélaga á Suðurnesjum (SSS) lýsir í ályktun þungum áhyggjum af þróun eignarhalds húsnæðis á svæðinu.
Gunnar Þórarinsson, nýkjörinn formaður SSS, segir í fréttaskýringu um þetta mál í Morgunblaðinu í dag, að enn gæti ástandið versnað.
„Það liggur ekki fyrir á þessari stundu hvort og þá hversu margar íbúðir til viðbótar ÍLS mun eignast vegna nauðungarsala. Það eru margir einstaklingar illa staddir fjárhagslega,“ sagði Gunnar. Hann bætir við að svo kunni að fara að ÍLS verði að leysa til sín íbúðir á Ásbrú, sem séu margar í eigu félaga sem standi illa.