Umferðin um Hvalfjörðinn hefur gengið vel og áfallalaust að sögn lögreglunnar í Borgarnesi.
Hvalfjarðargöngunum var lokað á föstudagskvöldið vegna malbikunarframkvæmda en koma til með að verða opnuð klukkan sex í fyrramálið, mánudagsmorgun.
Á þessum árstíma keyra um 11.000 bílar um göngin yfir helgi. Þeir sem áttu leið um þetta svæði um helgina þurftu að keyra fjörðinn til þess að komast leiðar sinnar.
Guðjón Sigmundsson, sem er betur þekktur sem Gaui litli, sagði í samtali við fréttastofu mbl.is að hann hefði aldrei séð aðra eins umferð um fjörðinn en Gaui rekur kaffihúsið Hvíta fálkann og Hernámssetrið í Hvalfirði.