Loftgæði við Voga í Mývatnssveit eru lítil fyrir viðkvæma, samkvæmt upplýsingum á vef Umhverfisstofnunar. Þar kemur fram að klukkan 7:50 hafi mengunin mælst þar 629 míkrógrömm á rúmmetra.
Við grunnskólann í Reykjahlíð við Mývatn eru loftgæðin sæmileg en annars staðar á landinu eru þau mikil.
Í dag (fimmtudag) má búast við gasmengun frá eldgosinu víða á norðanverðu landinu, frá Jökuldal vestur á Strandir. Á morgun (föstudag) eru horfur á mengun á svæðunum norður og austur af eldstöðinni, frá Eyjafirði og allt austur að Höfn í Hornafirði.