„Mjaðmagrindarbrot eru algengari en fólk gerir sér grein fyrir en brotin eru mun algengari hjá konum þar sem þær þjást frekar af beinþynningu.“
Þetta segir Unnur Lilja Úlfarsdóttir læknanemi í Morgunblaðinu í dag, en hún lagðist í rannsókn á mjaðmagrindarbrotum og komst að þeirri niðurstöðu að þau hefðu verið verulega vanmetin með tilliti til afleiðinga fyrir sjúklingana og kostnaðar þjóðfélagsins.
Rannsóknin var hluti af BS-verkefni hennar en leiðbeinendur hennar voru Gunnar Sigurðsson og Brynjólfur Mogensen. Rannsóknin var kynnt á lyflækningaþingi sem fram fór um helgina í Hörpu þar sem kynntar voru fjölmargar rannsóknir.