Umræða um virkjanir á villigötum

Jón Gunnarsson, formaður atvinnuveganefndar, segir misskilnings gæta í viðbrögðum við breytingatillögu hans og meirihluta nefndarinnar um að sjö virkjanir skuli fara ásamt Hvammsvirkjun í nýtingarflokk. Jón lagði tillöguna fram í morgun. Hann segir hana ekkert hafa með ákvörðun um að virkja að gera.

Eins og mbl.is hefur sagt frá er um að ræða Hvammsvirkjun, Há­göngu­lón I og II, Skrok­köldu­virkj­un, Hólmsá við Atley, Haga­vatns­virkj­un, Urriðafoss­virkj­un og Holta­virkj­un.

Þrjár virkjanirnar eru í Þjórsá; Hvammsvirkjun, Holtavirkjun og Urriðafossvirkjun.

Jón segir aðspurður það liggja fyrir í áætlun Landsvirkjunar að hefjast skuli fyrst handa við Hvammsvirkjun, sem sé efst í Þjórsá, og láta reyna á mótvægisaðgerðir gagnvart laxastofninum í Þjórsá.

Ferlið getur tekið nokkur ár

Spurður hvenær áformað sé að hefja uppbyggingu umræddra virkjana segir Jón að borið hafi á misskilningi í umræðunni.

„Það er ríkjandi misskilningur varðandi rammaáætlun. Það að setja virkjanir í nýtingarflokk hefur ekkert með þá ákvörðun að gera að þar verði virkjað. Þegar virkjanakostur fer í nýtingarflokk á eftir að fara í allt umhverfismat þeirra framkvæmda sem tilheyra hverri virkjun. Þannig að það er mikil vinna framundan. Umhverfismat getur tekið langan tíma, jafnvel nokkur ár,“ segir Jón Gunnarsson.

• 4 blogg um fréttina

Bloggað um fréttina

• Ómar Geirsson: Er afnám gjaldeyrishafta yfirvofandi??
• Eyjólfur Jónsson: Jón Gunnarsson er á þyngi af misskilningi og í raun …
• Jóhannes Laxdal Baldvinsson: Svipta þarf Jón Gunnarsson þingmannssætinu
• Ómar Ragnarsson: Hverjir eru á villigötum ?