Nýtist við leit og björgun

Landhelgisgæslan hefur gengið frá kaupum á nýrri gerð harðbotna slöngubáts sem smíðaður verður hjá Rafnari í Kópavogi. Báturinn verður afhentur um mitt næsta sumar.

„Það er búið að sanna fyrir okkur að þessi tegund hentar afar vel við okkar störf í sjónum hér við land,“ sagði Georg Lárusson, forstjóri LHG, í samtali við Morgunblaðið í gær. Hann segir að báturinn muni nýtast við leit og björgun, löggæslu og fiskveiðieftirlit á grunnslóð.

Landhelgisgæslan hefur haft tilraunaútgáfu af bátnum til prófunar um nokkurt skeið og siglt honum þrjú þúsund sjómílur í öllum veðrum, að því er fram kemur í umfjöllun um mál þetta í Morgunblaðinu í dag.