Innlent | mbl | 19.12.2014 | 18:16

Hornafjörður fór austur - og til baka

Ólöf Nordal innanríkisráðherra. mbl.is/Golli

Innanríkisráðherra hefur ákveðið að Sveitarfélagið Hornafjörður skuli tilheyra umdæmi lögreglustjórans á Suðurlandi.

Eitt síðasta opinbera verk Sigmundar Davíðs Gunnlaugssonar sem dómsmálaráðherra var að ákveða að Hornafjörður skyldi tilheyra umdæmi lögreglustjórans á Austurlandi í stað Suðurlands. Ákvörðunin var umdeild og margir gagnrýndu hana harðlega.

Fram kemur á vef innanríkisráðuneytisins, að Ólöf Nordal innanríkisráðherra hafi skrifað undir reglugerð um umdæmamörk sýslumannsembætta sem taka á gildi um næstu áramót þegar umdæmum sýslumannsembætta fækkar úr 24 í 9. Þá hefur ráðherra skrifað undir reglugerð um umdæmamörk lögregluembætta og verða umdæmin framvegis 9 en þau voru áður 15. Breytingarnar eru meðal þeirra umfangsmestu á umræddum embættum á síðari árum. Hefur undirbúningur staðið lengi yfir og stjórnvöld átt víðtækt samráð við fjölmarga aðila.

„Í tengslum við breytingarnar á umdæmaskiptingu lögregluembættanna á Suðurlandi og Austurlandi ákvað innanríkisráðherra að láta gera úttekt á rekstrarforsendum lögreglunnar á Austurlandi. Á grundvelli þeirrar úttektar hefur innanríkisráðherra ákveðið að Sveitarfélagið Hornafjörður skuli tilheyra umdæmi lögreglustjórans á Suðurlandi,“ segir í tilkynningunni.

Fram kemur, að ný lög um framkvæmdarvald og stjórnsýslu ríkisins í héraði hafi verið samþykkt á Alþingi í maí á þessu ári svo og breyting á lögreglulögum. Ný umdæmamörk embættanna séu ákveðin með reglugerðum eins og áskilið er í lögunum og þar sé einnig kveðið á um hvar aðalstöð lögreglustjóra og aðalskrifstofa sýslumanns sé í hverju umdæmi. Nýir lögreglustjórar og sýslumenn hafa verið skipaðir í embættin. Núverandi starfsstöðvar verða allar opnar áfram.

Umdæmi sýslumanna

Sýslumenn í umdæmunum 9 eru þessir:

Þórólfur Halldórsson í umdæmi sýslumannsins á höfuðborgarsvæðinu.
Ólafur K. Ólafsson í umdæmi sýslumannsins á Vesturlandi.
Jónas Guðmundsson í umdæmi sýslumannsins á Vestfjörðum.
Bjarni G. Stefánsson í umdæmi sýslumannsins á Norðurlandi vestra.
Svavar Pálsson í umdæmi sýslumannsins á Norðurlandi eystra.
Lárus Bjarnason í umdæmi sýslumannsins á Austurlandi.
Anna Birna Þráinsdóttir í umdæmi sýslumannsins á Suðurlandi.
Ásdís Ármannsdóttir í umdæmi sýslumannsins á Suðurnesjum.
Lára Huld Guðjónsdóttir í umdæmi sýslumannsins í Vestmannaeyjum.

Hin nýju embætti munu taka til starfa mánudaginn 5. janúar 2015 en 2. janúar verða embættin lokuð vegna umfangsmikilla tölvukerfiskerfisbreytinga hjá ríkinu vegna umdæmabreytinganna.

Reglugerð um umdæmi sýslumanna. Í reglugerðinni eru umdæmamörk skilgreind og tilgreint hvar eru aðalskrifstofur embættanna, hvar sýsluskrifstofur og hvar útibú.

Umdæmi lögreglustjóra

Landið skiptist í 9 lögregluumdæmi. Með lögreglustjórn fara lögreglustjórar sem hér segir:

Sigríður Björk Guðjónsdóttir lögreglustjóri á höfuðborgarsvæðinu.
Úlfar Lúðvíksson lögreglustjóri á Vesturlandi.
Karl Ingi Vilbergsson lögreglustjóri á Vestfjörðum.
Páll Björnsson lögreglustjóri á Norðurlandi vestra.
Halla Bergþóra Björnsdóttir lögreglustjóri á Norðurlandi eystra.
Inger L. Jónsdóttir lögreglustjóri á Austurlandi.
Kjartan Þorkelsson lögreglustjóri á Suðurlandi.
Ólafur Helgi Kjartansson lögreglustjóri á Suðurnesjum.
Páley Borgþórsdóttir lögreglustjóri í Vestmannaeyjum.

Reglugerð um lögregluumdæmi lögreglustjóra. Í reglugerðinni eru umdæmamörk skilgreind og tilgreint hvar eru aðalstöðvar lögreglustjóra og hvar aðrar starfsstöðvar.