Jónas Sigurðsson, yfirlögregluþjónn á Vestfjörðum, segir að verið sé að rýma svæði 4, svæðið við Mýrar og Hóla á Patreksfirði þessa stundina. Það gangi hægt og bítandi þar sem nú er „leiðinda veður og ófærð“.
Líkt og greint var frá á mbl.is fyrir skemmstu hefur hættustigi verið lýst yfir á Patreksfirði vegna snjóflóðahættu og reitur 4 rýmdur.
Björgunarsveitarmenn og lögregla á Patreksfirði vinna nú að rýmingu svæðisins. Nokkrir tugir íbúa eru á svæðinu segir Jónas, en tekur þó fram að fjöldinn hefur ekki verið staðfestur.
„Það er skítaveður. Hér er hífandi rok og bullandi ofanúrkoma,“ segir Gunnar Sean Eggertsson, íbúi á Hólum. Hann segir að þokkalega hafi gengið að rýma götuna en að veðrið hafi gert erfitt fyrir.
„Það verður ófært í götunni á tíu mínútum. Ég held að ég sé búinn að moka hana sex sinnum í dag frá hádegi,“ segir Gunnar. Hann segir að lögregla hafi hringt í hús á svæðinu.
„Ef fólk kemst ekki af sjálfsdáðum þá sækir björgunarsveitin það. Ég er svo heppinn að ég á lyftara og gat ég mokað frá húsinu mínu þannig við gátum keyrt á bílnum,“ segir Gunnar aðspurður um hvernig staðið sé að rýmingunni.
Íbúar á svæði 4 fá flestir inni hjá ættingjum eða vinum á svæðinu á meðan á hættustiginu stendur en að sögn Ásgeirs Sveinssonar, 2. varabæjarforseta bæjarstjórnar Vesturbyggðar, geta þeir sem eiga ekki í nein hús að venda gist á hótelinu í bænum, Fosshótel á Vestfjörðum, og greiðir sveitarfélagið og almannavarnir fyrir dvöl þeirra.