„Þetta eru bara fordómar og ekkert annað,“ segir Huginn Þór Grétarsson, höfundur barnabókanna Líkaminn hennar Söru og Líkaminn hans Jóa, sem hafa hlotið töluverða gagnrýni fyrir það að kalla kynfæri stúlkna „buddu“ en ekki píku.
Sigrún Bragadóttir skrifaði opið bréf til bókaútgáfunnar Óðinsauga, sem gefur bækurnar út, á vefritið knuz.is í október sl. þar sem hún gagnrýnir bækurnar. Nú hefur enn á ný myndast umræða um málið á samfélagsmiðlum, og virðast margir hafa sterkar skoðanir.
„Þetta er furðulegur rembingur í ákveðnum hópi femínista um að það megi bara nota eitt orð yfir kynfæri ungra stúlkna. Um þau eru mörg samheiti, meðal annars budda sem mér er tamt úr uppeldi og sem höfundur nota ég það,“ segir Huginn Þór. „Að píka sé eina rétta orðið er bara firring.“
Segir hann bókina verkfæri í hendur foreldra fyrir ólæs börn sín, sem geti nýst vel til þess að ræða um líkama og líkamsvirðingu. Foreldrar geti þó notað þau orð sem þeim er tamt. „Ég tel að það eigi ekki að búa til einhverjar grýlur með því að gagnrýna orð sem hafa lengi verið í notkun. Það er hrein og klár neikvæðni inn í umræðuna um líkama barna, í stað þess að ræða á jákvæðann hátt um líkamann og gefa öllum þessum orðum jákvæðna gildishlaðningu.“
Í bréfi Sigrúnar, sem hún kallaði „Buddubréf“ benti hún á að margir ættu í stökustu vandræðum með að tala um þennan líkamshluta vegna þess hve gildishlaðið orðið „píka“ er. „Kannski er það ekkert skrítið því fáir líkamshlutar hafa verið jafn niðurlægðir í gegnum tíðina, brotið á þeim, hrækt á þá eða þeir uppnefndir á viðurstyggilegan hátt. Af því leiðir líklega að í viðleitni til að tala fallega um píkur eru iðulega dregin upp hin furðulegustu gælunöfn á borð við dúlla, blúnda, kjallari, kisa, stína, klobbi, pjása, rifa og……BUDDA!“
Veltir hún því upp hvort fullorðið fólk þori ekki að nefna líkamshluta sínum réttu nöfnum, og segist telja það algjöran óþarfa að nota orðið „budda“ yfir píku í nýlegum barnabókum. „Buddur geyma klink, píkur geyma t.d. leg og eggjastokka. Í buddur má troða ýmsu smálegu en ekki í píkur, það getur verið hættulegt. [...] Hversu gagnlegt er það fyrir líkamsmynd og kynverund stúlkna að fá þau skilaboð að þær séu með buddu í klofinu?“
Huginn segir að pjalla, klobbi, budda og fleiri orð hafi verið notuð yfir kynfæri stúlkna og þau séu öll góð og gild. Að úthrópa þau sem eitthvert pjatt sé frekt og merki um þröngsýni. Þá tekur hann fram að orðið „píka“ geti líka haft fleiri en eina merkingu en honum þyki það þó hið ágætasta orð.
„Mér finnst það skammarlegt hjá femínistahreyfingunni að búa til einhverja neikvæðni í kringum orðanotkun yfir þennan líkamshluta. Mér finnst þetta svo litað af fáfræði og nornaveiðum eins og það eigi að ráðast á þá sem eru ekki sammála. Þessi hópur femínista er kominn með öfgatilburði,“ segir hann.
Þá segir hann umræðuna bera vott af ofríki, og það séu „frekjutilburðir að heimta að aðeins eitt orð sé rétt. Það er einfaldlega ekki þannig og það er ekki á dagskrá útgáfunnar að hefta tjáningarfrelsi höfunda vegna hreyfingar sem telur sig hafa fundið hið eina sanna orð yfir kynfæri stúlkna.“
Þá bendir Huginn á að samheiti séu vel þekkt yfir fullt af hlutum og segist hann hafna því algjörlega að eitthvað eitt orð sé réttara en önnur. Til dæmis séu mörg orð yfir snjó í íslenskri tungu, því hann sé fólki hugleikinn. „Ef eitthvað er í brennidepli getur það vel orsakað að um það verði búin til mörg orð og samheiti. Þetta getur átt við um kynfæri kvenna sem þarf ekki að vera neikvætt. Orð verða til við notkun tungumálsins. Budda hefur ekki neina neikvæðna gildishlaðningu þó það hafi vissulega fleiri en eina merkingu.“
Þá segir hann orðanotkunina vissulega landshlutatengda, en „budda“ hafi honum fundist vera í meiri notkun á Norðurlandi. „Það er ekki hægt að ætlast til þess að sunnlenska sé eina rétta tungumálið. Ef gamalt orð sem hefur verið notað lengi er svona mikið fyrir þeim mega þær líka spyrja sig um uppruna píku.“
„Mega ekki vera notuð krúttleg orð um kynfæri lítilla stúlkna? Við gerum greinarmun á stúlkum sem hafa ekki náð kynþroskaaldri og fullorðnum konum, en það er engin lögregla femínista sem segir að það verði að vera notað sama orðið þegar þú ert lítil stúlka og fullorðin kona,“ segir hann að lokum.