Ökumaður sem ók bifreið sinni af vettvangi eftir 10 bíla árekstur í blindbyl norðan við Biskupsbeygju á Holtavörðuheiði rétt fyrir klukkan fimm í gær hefur gefið sig fram.
Lýsti lögreglan á Vesturlandi eftir bifreiðinni í gærkvöldi en samkvæmt lýsingu lögreglu var hún ljósgræn fólksbifreið, sennilega Subaru, sem ekið var norður. Stórhríð og mikil hálka var á heiðinni er áreksturinn varð.
Samkvæmt upplýsingum frá lögreglunni á Vesturlandi gaf ökumaður bifreiðarinnar sig fram við lögreglu fyrr í morgun og verður hlutdeild hans í árekstrinum skoðuð.
Allir bílarnir sem lentu í árekstrinum í gær voru á norðurleið og er helmingur þeirra óökuhæfur. Minniháttar slys urðu á fólki.
Ók af vettvangi á Holtavörðuheiði