Ný skoðanakönnun sem Gallup gerði fyrir Landvernd og Náttúruverndarsamtök Íslands 5. til 12. mars sl. sýnir að andstaða almennings við lagningu háspennulínu yfir Sprengisand hefur aukist umtalsvert.
Spurt var: „Ertu hlynnt(ur) eða andvíg(ur) því að lögð verði háspennulína yfir hálendið um Sprengisand?“
Hlutfall þeirra sem eru andvígir er nú 43,4% en í sambærilegri könnun sem gerð var í ágúst 2012 voru 36% aðspurðra andgvíg lagningu háspennulínu yfir Sprengisand. Hlutfall þeirra sem eru andvígir háspennulínu hefur því aukist um 7,5 prósentustig, að því er segir í tilkynningu frá Náttúruverndarsamtökum Íslands.
Þá segir, að sömuleiðis hafi stuðningur við Sprengisandslínu minnkað frá því í ágúst 2012. Þá voru 28% aðspurðra fylgjandi lagningu háspennulínu yfir Sprengisand en nú eru 25,4% fylgjandi.
„Í síðustu viku kynntu samtökin könnun sem sýndi að stuðningur almennings við stofnun þjóðgarðs á miðhálendi Íslands hefur aukist umtalsvert miðað við sambærilega könnun árið 2011. Af því má ráða að stuðningur við verndun hálendisins njóti vaxandi stuðnings í þjóðfélaginu. Stefna ríkisstjórnarinnar gengur þvert á þann almenna vilja.
Framkvæmd þessarar skoðanakönnunar er hluti af hálendisverkefni Landverndar og Náttúruverndarsamtaka Íslands. Verkefnið nýtur stuðnings Náttúruverndarsjóðs Pálma Jónssonar og fjár sem safnaðist á tónleikunum 'Gætum garðsins' sem haldnir voru samtökunum tveimur til stuðnings í mars 2014,“ segir í tilkynningu.