Fyrsta aprílgabbið í Morgunblaðinu

Fyrsta aprílgabb fjölmiðils hér á landi sem vitað er um birtist í Morgunblaðinu árið 1953. Þá var greint frá því á baksíðu blaðsins að til umræðu hefði komið að fá nýja fjögurra hreyfla farþega- og flutningavél til þess að halda uppi samgöngum á milli Reykjavíkur og Akraness.

Birt var mynd af flugvélinni sem átti að hafa verið á sveimi yfir borginni en flugvélin var talsvert sérstök útlits. Var um að ræða rútu með vængi, hreyfla og stél.

Daginn eftir sagði í Morgunblaðinu að starfsmenn þess hefðu tekið upp á þeirri nýbreytni „að birta aprílgabb í Morgunblaðinu í gær“ og gengist við því að birt hefði verið samsett mynd af strætisvagni og flugvél. Víkverji Morgunblaðsins greindi frá því nokkrum dögum síðar að aprílgabbið hefði tekist ágætlega. Hringt hefði verið á skrifstofur blaðsins og spurt hvenær vélin tæki upp áætlunarferðir og að Akurnesingar hafi verið spennti við tilhugsunina um að nýta sér þetta kostulega farartæki og komast til Reykjavíkur á fáeinum mínútum, eins og segir í umfjöllun Jónasar Ragnarssonar í Morgunblaðinu 31. mars 2002.

Morgunblaðið hélt síðan uppteknum hætti árið eftir, þegar birt var frétt þess efnis að bandaríski kvikmyndaleikarinn Tyrone Power hefði óvænt heimsótt Ísland, og hefur gert síðan.

• Blogga um frétt