Verkfall hjúkrunarfræðinga hófst á miðnætti í gær. 2100 hjúkrunarfræðingar leggja niður störf, þar af um 1400 á Landspítalanum. Hluti þeirra eru áfram í vinnu til þess að tryggja öryggi sjúklinga samkvæmt undanþágulistum.
Krabbameinssjúklingur sem leitaði læknishjálpar á bráðamóttöku Landspítalans í dag fær ekki að leggjast inn á krabbameinsdeild vegna ástandsins og mun líklega þurfa að vera áfram á bráðamóttöku.
Hjúkrunardeildarstjóri á krabbameinsdeild á Landspítalanum við Hringbraut segir ástandið alvarlegt.
„Við fengum heimild fyrir mönnun sem er í rauninni minni en venjuleg helgarmönnun hjá okkur,“ segir Halldóra Hálfdánardóttir, hjúkrunardeildarstjóri á krabbameinsdeild 11E á Landspítalanum við Hringbraut. „Ég hef sótt um undanþágubeiðnir um næturvaktir fram að þessu og fengið jákvætt við því en var að fá núna höfnun á undanþágu fyrir kvöldvöktum sem þýðir það að ég þarf að loka fyrir innlagnir.
En til þess að kvöldvaktin fari ekki á hvolf þarf að útskrifa tvo sjúklinga sem ég sé ekki fram á að geta gert. Það eru sjúklingar sem eru einfaldlega of veikir til þess að fara heim.“
Að sögn Halldóru er búið að tilkynna krabbameinssjúkling til deildarinnar sem er nú á bráðamóttöku sjúkrahússins. „ Hann þyrfti að komast til okkar og við sögðum nei við því. Ég veit ekki hvort hann muni fara á aðra deild, hvort að önnur sé betur búin en við, en ég er ekki viss um það,“ segir Halldóra sem gerir ráð fyrir því að maðurinn þurfi að vera áfram á bráðamóttökunni. Þar fær hann ekki þá umönnun sem hann þarf enda eru þar ekki starfandi krabbameinshjúkrunarfræðingar eða krabbameinslæknar.
Halldóra segir að á deildinni séu venjulega fjórir hjúkrunarfræðingar á morgunvakt, þrír á kvöldvakt og tveir á næturvakt. Eftir að verkfallið hófst fékkst heimild fyrir þrjá á morgunvakt, tvo á kvöldvakt og einn á næturvakt.
„Það munar alltaf um einn,“ segir Halldóra. „Við erum með skráningakerfi sem flokkar sjúklinga eftir hversu mikla umönnun þeir þurfa. Á venjulegum degi erum við á réttu róli en þegar álagið er mikið erum við á „rauðu“ eins og um helgar. Strax á fyrsta degi í gær vorum við á rauðu. Þetta gengur ekki svona mikið lengur.“
Aðspurð hvort hún sé áhyggjufull yfir því að með þessu ástandi sé öryggi sjúklinga í hættu svarar Halldóra því játandi. „Ég er með sérstakar áhyggjur yfir kvöldvaktinni ef ég fæ ekki auka heimild.“
Hún segir alla á sjúkrahúsinu áhyggjufulla yfir ástandinu, sérstaklega í ljósi þess að ekki hefur verið boðað til nýs fundar í deilunni. „Á meðan staðan er þannig sér ekki fyrir endann á verkfallinu. Sjúklingarnir eru smeykir og starfsfólkið líka, engum líður vel í þessu ástandi.“