Alls 8.568 skjöl biðu þinglýsingar hjá Sýslumanninum á höfuðborgarsvæðinu í gærmorgun og er meirihlutinn vegna kaupsamninga með fasteignir.
Staflinn er tilkominn af því að þinglýsingar hafa legið niðri síðan í lok vinnudags 1. apríl vegna verkfalls félagsmanna BHM hjá embættinu.
Þórólfur Halldórsson, sýslumaður á höfuðborgarsvæðinu, segir skjölin sem ekki hafa verið þinglýst varða til dæmis lóðaleigu- og húsaleigusamninga og veðsetningu vegna bílakaupa og umboð ýmiss konar. Stærstur hluti sé þó vegna fasteigna; kaupsamingar, afsöl, veðskuldabréf og lánssamningar. Hann segir dagbók embættisins ekki sundurliðaða eftir tegund skjala.