Sandfok af Landeyjasandi lagðist yfir höfuðborgina og skerti loftgæði

„Mjög líklega var þetta sandfok frá Landeyjasandi. Upp úr klukkan 11 lagðist rykið yfir og náði hámarki um 16 þegar svifrykið mældist um 350 míkrógrömm á rúmmetra,“ segir Þorsteinn Jóhannsson, jarð- og umhverfisfræðingur hjá Umhverfisstofnun.

Eftir þurrkatíð undanfarið myndaðist þurramistur og minnti höfuðborgin meira á mengandi stórborg í suðri en tiltölulega hreina borg í norðri. Búist var í gærkvöld við rigningu sem ætti að draga úr svifryksmenguninni.

„Þetta var ekkert hættulegt heilsuhraustu fólki en ég hefði ekki ráðlagt neinum að hlaupa hálfmaraþon,“ segir Þorsteinn.