Leggja áherslu á börn og ungmenni

„Þetta gekk allt saman mjög vel í morgun, veðurguðirnir drottnuðu yfir okkur,“ segir Torfi Leósson skipuleggjandi Sri Chinmoy Friðarhlaupsins.

Hlaupið var sett í morgun með táknrænni athöfn við Tjörnina í Reykjavík. Það var borgarstjóri sem setti hlaupið og hljóp fyrsta sprettinn ásamt krökkum úr leikskólanum Tjarnarborg, stúlkum úr fjórða flokki Vals og alþjóðlega Friðarhlaupsliðinu. Hlaupið var í Reykjavík og á Seltjarnarnesi.

Setningarathöfn Friðarhlaupsins. KRISTINN INGVARSSON

Dagskráin á morgun er að hlaupa út af höfuðborgarsvæðinu og enda í Grindavík. Hlaupið verður meðfram strandlengjunni suðurleiðin um landið. Alþjóðlega hlaupaliðið mun hlaupa alla leiðina en hlaupið er í boðhlaupi. Leiðin er um 2700 kílómetrar og mun hver hlaupari því hlaupa 10 til 20 kílómetra að meðaltali á dag og stendur hlaupið yfir frá 1.- 24. júlí. 

Torfi býst við góðri þátttöku og segir marga þekkja hlaupið þar sem að þetta er í tíunda skiptið sem það er haldið. Öllum gefst færi á að taka þátt en sérstök áhersla er lögð á þátttöku barna og ungmenna.

Tilgangur hlaupsins er að efla frið, vináttu og skilning manna og meinningarheima á milli. Sem tákn um þessa viðleitni bera hlaupararnir logandi kyndil sem berst manna á milli.

Fyrri frétt mbl.is um hlaupið. 

Borgarstjóri hljóp fyrsta sprettinn. KRISTINN INGVARSSON

• Blogga um frétt