Taka þátt í USAR 2015

Fimmtán manna hópur frá unglingadeildum Slysavarnafélagsins Landsbjargar er í Rússlandi og tekur þátt í æfingunni USAR 2015.

Íslensku þátttakendurnir eru á aldrinum 15 - 17 ára og koma úr unglingadeildum björgunarsveita um allt land. Æfingin fer fram í Noginsk í Rússlandi og eru þátttökulönd að þessu sinni ellefu talsins. Æfingin stendur í sex daga og lýkur á 14 klst. rústaæfingu þar sem allar þátttökuþjóðir vinna saman.

Það eru ýmis verkefni sem þátttakendur þurfa að leysa en auk rústabjörgunar er tekist á við slasaða einstaklinga, fjallabjörgun og fleira, samkvæmt upplýsingum frá Slysavarnafélaginu Landsbjörg.