Lét reiði sína bitna á húsgögnunum

Í gærkvöldi var óskað eftir aðstoð lögreglu að hóteli í austurhluta borgarinnar vegna skemmdarverka. Hafði kastast í kekki milli manns og konu sem varð til þess að maðurinn lét reiði sína bitna á húsmunum. Málið afgreitt með skýrslutöku á staðnum.

Upp úr klukkan sautján í gær var óskað eftir aðstoð lögreglu að Gistiskýlinu en þar lét maður ófriðlega sökum ölvunar. Þegar lögregla kom á staðinn beindist ófriðurinn og ógnandi hegðun að lögreglu. Maðurinn handtekinn og vistaður í fangageymslu þar til ástand batnar.

Á tíunda tímanum var óskað eftir lögreglu að heimahúsi en þar hafði kastast í kekki milli húsráðanda og gestkomandi en sá síðarnefndi orðinn töluvert ölvaður. Nærveru hans ekki óskað lengur en hann vildi ekki hlýða fyrirmælum lögreglu um að yfirgefa vettvang. Fór svo að hann var handtekinn og gistir fangageymslur þar til ástand batnar.

• Blogga um frétt