Loftnet Landhelgisgæslunnar, sem notað er til þess að hafa samskipti við skip við Faxaflóa, sló út í kjölfar þess að eldingu laust niður við eina af rafmagnslínum Orkuveitu Reykjavíkur í kvöld.
Það kom þó ekki að sök þar sem til staðar er þéttriðið net loftneta og senda í kringum Faxaflóa, samkvæmt upplýsingum frá Landhelgisgæslu Íslands. Síminn, Vodafone og Isavia eru með loftnet á sömu staðsetningu og sló þeim einnig út.
Rafmagnsleysið varði í u.þ.b. eina og hálfa klukkustund eða á milli klukkan 19:30 og 21:00.
Þrumugarður gekk yfir Reykjanes og inn á suðvesturhornið í kvöld eins og mbl.is hefur greint frá. Mátti t.a.m. heyra háværar þrumur í námunda við höfuðstöðvar mbl.is og Morgunblaðsins við Hádegismóa í Reykjavík auk þess sem fjölmargir settu sig í samband við mbl.is og tilkynntu um þrumur og ljósleiftur yfir Kópavogi, Garðabæ, Vesturbæ Reykjavíkur og miðbænum.
Sjá fréttir mbl.is um málið:
Þrumugarður gekk yfir Reykjanes