Snjókoma breytist í rigningu

Hlý skil úr suðri nálgast land og þýðir það aukna úrkomu sem byrjar með snjókomu eða slyddu sunnan- og vestanlands með morgninum, en rigningu síðdegis. Fyrir norðan og austan verður hins vegar hæglætisveður og nokkuð bjart fram eftir degi, en í kvöld þykknar upp með dálítilli snjókomu eða slyddu.

Vindurinn tekur ekki við sér að ráði fyrr en í kvöld og nótt, en þá bætir í suðvestanáttina. Hvassviðri á morgun, jafnvel stormur á stöku stað, og slydduél eða él, en úrkomulítið austan til og kólnar aftur í veðri. Eftir hádegi snýst í norðaustanhvassviðri norðvestan til, jafnvel storm, með snjókomu og skafrenningi sem breiðir úr sér yfir norðan vert landið þegar kemur fram á kvöld. Ljóst er að færðin verður ekki góð fyrir norðan og varasöm skilyrði gætu myndast, einkum á heiðum. Norðanáttin heldur velli næstu daga og má búast við talsverðu frosti um helgina og áfram lélegri færð fyrir norðan, segir í hugleiðingum veðurfræðings á Veðurstofu Íslands í morgun.

Hálkublettir eru á Hellisheiði og í Þrengslum og hálka eða hálkublettir á öðrum leiðum á Suðurlandi. Á Vesturlandi er hálka eða hálkublettir á vegum.

Snjóþekja eða hálka er á Vestfjörðum. Hálka og hálkublettir eru á vegum á Norður- og Austurlandi.

Greiðfært er víðast hvar með suðausturströndinni en hálkublettir á milli Kirkjubæjarklausturs og Mýrdalssands.

• Blogga um frétt