„Þetta mál var bara að koma inn á borð hjá okkur í dag og er til skoðunar. Ég get á þessu stigi ekkert sagt um það hvort útflutningur þessa frímerkjasafns sé óheimill vegna lagaákvæða.“
Þetta segir Agnes Stefánsdóttir hjá Minjastofnun Íslands í Morgunblaðinu í dag, en verðmætasta frímerkjasafn á Íslandi verður boðið upp hjá Postiljonen í Malmö í Svíþjóð í mars á næsta ári og hefur þegar verið flutt úr landi, að því er fram kemur í umfjöllun um mál þetta í blaðinu.
„Við gerum okkur vonir um að safnið seljist á 500 til 600 þúsund evrur, fari ekki undir 75 milljónir íslenskra króna,“ sagði Steinar Eyþórsson, starfsmaður Postiljonen, sem er stærsta frímerkjauppboðshús Norðurlanda.