Lokanir norðantil vegna snjóflóða

Ábendingar frá veðurfræðingi

Snjókomubakkinn norðanlands er ansi dimmur og enn er að bæta í vind. Veðurhæð verður nærri 15 m/s um og upp úr miðjum degi, en undir kvöld fer heldur að draga úr á Holtavörðuheiði og í Húnavatnssýslum. Á Vestfjörðum verður éljagangur og skafrenningur á fjallvegum í allan dag. Norðaustan- og austanlands verður veður skaplegra, en þar má þó búast við éljum eða snjókomu síðar í dag og hvasst um tíma.

Lokað

Búið er að loka veginum um Siglufjarðarveg og Ólafsfjarðarmúla vegna snjóflóða og snjóflóðahættu.

Færð og aðstæður

Hálkublettir eru á Reykjanesbraut en hálka á Hellisheiði og í Þrengslum. Hálka eða hálkublettir og sumstaðar snjóþekja er á vegum á Suður- og Suðvesturlandi.

Snjóþekja og snjókoma er á Holtavörðuheiði og þungfært er um Bröttubrekku en mokstur stendur yfir. Annars er snjóþekja, hálka eða hálkublettir á Vesturlandi.

Á Vestfjörðum er snjóþekja á Steingrímsfjarðarheiði og Þröskuldum þar sem einnig er skafrenningur. Hálka eða snjóþekja er annars á flestum öðrum leiðum, þó er þæfingsfærð og skafrenningur á Klettshálsi. Ófært er úr Bjarnarfirði í Árneshrepp og ófært er einnig um Hrafnseyrarheiði og Dynjandisheiði.

Á Norðurlandi er nú víða farið að snjóa töluvert og búist er við að færð geti versnað þegar líða tekur á daginn. Lokað er vegna snjóflóða um Siglufjarðarveg og Ólafsfjarðarmúla.
Á Norðvesturlandi er snjóþekja og snjókoma  eða skafrenningur víðast hvar. Norðaustanlands er snjóþekja og snjókoma á flestum leiðum, þæfingsfærð er á Hólasandi og Hófaskarði. Flughált er á Dettifossvegi.

Á Austurlandi er hálka, snjóþekja eða hálkublettir.

Umferðartafir í Strákagöngum

Vegna vinnu við endurbætur á rafkerfi í Strákagöngum má búast við umferðartöfum
þar á virkum dögum frá klukkan 8.00-18.00 í nóvember og til 22. desember.