Stormur á morgun og slæm færð

Veðurstofa Íslands vekur athygli á mjög slæmri veðurspá fyrir morgundaginn, þar sem gert er ráð fyrir austanstormi víða um land seinnipartinn. Færð verður mjög slæm og ekkert ferðaveður, segir á vef Veðurstofnnar.

Sjá veðurvef mbl.is.

Þar segir einnig, í athugasemd frá veðurfræðingi, að þar sem saman fara vindur og hiti undir frostmarki ásamt lausum snjó megi gera ráð fyrir miklum skafrenningi og þá mun snjóa að auki.

Um horfur næsta sólahringinn segir almennt:

Hægt minnkandi norðan- og norðvestanátt og dregur smám saman úr úrkomu. Frost 0 til 7 stig. Norðlæg átt 3-10 í dag og él á víð og dreif um allt land, en austlægari og víða þurrt í kvöld. Kólnar í veðri. Vaxtandi austanátt í nótt, 15-25 síðdegis, hvassast syðst og vestast. Snjókoma og skafrenningur. Snýst í mun hægari SV- og V-átt S- og V-til á landinu annað kvöld. Frost víða 0 til 6 stig.

• Blogga um frétt