Enskir æfir vegna íslenskra miða

Enskir fjölmiðlar gerðu sér mat úr því um helgina að Íslendingar myndu fá um 8.000 fleiri miða fyrir áhorfendur sína en Englendingar á leiki liðanna á Evrópumótinu sem fram fer í Frakklandi á næsta ári.

Sunnudagsútgáfa breska blaðsins Daily Star gerði málið að umfjöllunarefni og talað er um hneyksli á forsíðu blaðsins en fréttamiðlar á borð við BBC og Sky News gerðu málinu einnig skil.

Er bent á það að ef miðað er við þá rúmlega 30 þúsund miða sem KSÍ fær fyrir stuðningsmenn þá jafngildi það að um 10% íslensku þjóðarinnar geti farið á leiki liðsins. Til samanburðar er aðeins einn miði í boði fyrir hverja 2.254 Englendinga, að því er fram kemur í umfjöllun um mál þetta í Morgunblaðinu í dag.