Slagsmál, innbrot og ökumenn í vímu

Slagsmál, í annarlegu ástandi og lét ófriðlega, ökumenn undir áhrifum áfengis og fíkniefna á ferðinni og innbrot. Þetta er meðal þess sem lögreglan á höfuðborgarsvæðinu þurfti að fást við í gærkvöldi og nótt.

Það var um ellefu leytið í gærkvöldi þegar starfsfólk bráðamóttöku óskaði eftir aðstoð lögreglunnar vegna manns sem var í mjög annarlegu ástandi og lét ófriðlega. Lögregla fjarlægði manninn og gistir hann fangageymslu þangað til af honum rennur víman.

Tilkynning barst til lögreglu um eitt leytið í nótt um slagsmál fyrir utan skemmtistað í miðborginni. Lögreglan handtók einn á staðnum en hann neitaði að fara að fyrirmælum lögreglu og gaf hvorki upp kennitölu né dvalarstað. Hann verður yfirheyrður síðar í dag en gistir fangaklefa þangað til.

Um klukkutíma síðar var maður handtekinn fyrir að kasta af sér vatni á Stjórnarráðsbygginguna. Hann var látinn laus að lokinni skýrslu.

Lögreglan handtók mann sem var gripinn glóðvolgur við innbrot í verslun í austurhluta borgarinnar um eitt í nótt. Það voru öryggisverðir sem urðu varir við kauða en sá gistir fangaklefa og verður yfirheyrður síðar í dag.

Um þrjú barst síðan tilkynning um innbrot í verslun í Árbæ og handtók lögreglan tvo á vettvangi og gista þeir fangaklefa en verða yfirheyrðir síðar í dag.

Tveir ökumenn voru síðan stöðvaðir vegna aksturs undir áhrifum áfengis og einn vegna aksturs undir áhrifum fíkniefna. Sýni voru tekin úr þeim öllum en sleppt að því loknu.

• Blogga um frétt