Héraðsdómur hafnaði í dag beiðni þeirra Jóns Ásgeirs Jóhannessonar, Lárusar Welding og Magnúsar Arnar Arngrímssonar, sem ákærðir eru í Aurum-holding málinu, um að fengnir yrðu nýir dómskvaddir matsmenn til að meta virði Aurum á þeim tíma sem málið nær til.
Fyrr á þessu ári hafði saksóknari í málinu óskað eftir því að möt undir- og yfirmatsmanna frá fyrri aðalmeðferð yrðu lögð fyrir í málinu. Héraðsdómur hafnaði því en Hæstiréttur snéri því við.
Í ljósi þeirrar niðurstöðu óskuðu verjendur í málinu eftir því að nýtt mat yrði gert sem heyrði undir þetta mál beint, en segja þeir að meðal annars hafi ný gögn komið fram í málinu síðan fyrri mötin voru gerð.
Möt sem þessi gætu skipt talsverðu máli fyrir niðurstöðu málsins enda er verðmæti félagsins Aurum-holding eitt af lykilatriðum þess.
Lögmenn ákærðu í málinu tóku ekki ákvörðun um hvort niðurstaðan yrði kærð til Hæstaréttar, en dómari frestaði málinu þangað til niðurstaða væri komin í málið. Í næsta þinghaldi verður því annað hvort farið yfir stöðu dómskvaddra matsmanna ef Hæstiréttur snýr niðurstöðu héraðsdóms við eða dagsetning fyrir aðalmeðferð ákveðin.
Aurum Holding-málið hefur verið lengi til meðferðar í dómskerfinu, en upphaflega var ákært í málinu í desember 2012 og það þingfest í janúar 2013. Aðalmeðferð málsins fór svo fram á fyrri hluta ársins 2014. Voru allir sakborningar í málinu sýknaðir, en Hæstiréttur ógilti svo dóminn vegna tengsla meðdómara við sakborninga í Al Thani-málinu svokallaða. Þá var settum dómara málsins, Guðjóni St. Marteinssyni gert að víkja til að gæta óhlutdrægni í málinu. Síðan þá hefur talsvert verið tekist á um dómara málsins sem og matsskýrslur. Málið hefur því verið fyrir dómstólum núna í rúmlega 3 ár.