Innlent | mbl | 6.5.2016 | 15:34

Gísli Marteinn biðst afsökunar

Gísli Marteinn Baldursson. mbl.is/Kristinn

„Þetta er dæmi um mál þar sem við vorum of fljót að dæma. Meðferð nauðgunarmála þarf að breytast, en þetta var ekki rétt leið.“ Þetta skrifaði Gísli Marteinn Baldursson fjölmiðlamaður á Twitter í gær.

Þann 9. nóvember á síðasta ári deildi lögreglan á höfuðborgarsvæðinu eftirfarandi texta á Twitter: „Í dag, mánudag, verður lögreglan með ómerktan bíl við hraðaeftirlit, en mælt verður við Digranesveg í Kópavogi og Baugshlíð í Mosfellsbæ.“

Þetta var sama dag og Fréttablaðið birti forsíðufrétt þess efnis að tveir karlmenn væru grunaðir um hrottaleg kynferðisbrot. Voru mennirnir sagðir hafa brotið á tveimur konum í íbúð í Hlíðunum sem hefði verið útbúin til nauðgana. Þá kom einnig fram að mennirnir væru ekki í gæsluvarðhaldi vegna málsins og vakti það töluverða reiði í samfélaginu.

Gísli Marteinn svaraði tísti lögreglunnar á eftirfarandi hátt og vísaði í mál mannanna: „Einhver séns að hann kippi þessum nauðgurum sem þið slepptuð uppí ef þið rekist á þá?“ Fjörutíu og einn deildi færslunni og rúmlega fimm hundruð manns „lækuðu“ færsluna.

@logreglan Þetta er dæmi um mál þar sem við vorum of fljót að dæma. Meðferð nauðgunarmála þarf að breytast, en þetta var ekki rétt leið.
— Gísli Marteinn (@gislimarteinn) May 5, 2016

Í gær svaraði Gísli Marteinn færslunni aftur með þessum orðum: „Þetta er dæmi um mál þar sem við vorum of fljót að dæma. Meðferð nauðgunarmála þarf að breytast, en þetta var ekki rétt leið.“

Því fylgdi hann eftir með þessu: „Enginn dómur var fallinn og þótt við reiðumst eigum við að treysta dómstólum og bíð með dóma þar til niðurstaða liggur fyrir.“

Í lokin segir hann: „Tek fram að þetta er ekki skrifað vegna neinna hótana um málsókn. Hef engar slíkar fengið. Ætlaði að vera búinn að þessu fyrr.“

Vilhjálmur Hans Vilhjálmsson, lögmaður tveggja karlmanna sem kærðir voru fyrir nauðganir seint á síðasta ári, sendi tuttugu og tvö kröfubréf fyrir viku og gaf frest til miðnættis mánudaginn 2. maí til að bregðast við kröfunum.

Í bréfunum var viðtakendum boðið að setja fram opinbera afsökunarbeiðni vegna ummæla sinna, draga þau til baka og greiða skaðabætur. Yrði það ekki gert geta þeir gert ráð fyrir að þeim verði stefnt vegna ummælanna.

Afsökunarbeiðni vegna málsns var birt á fréttavef DV.is síðastliðið miðvikudagskvöld. Þar sagði að blaðið og fyrrverandi blaðamaður DV biðjist afsökunar á því sem ofsagt hafi verið í þremur fréttum af Hlíðamálinu, sem birtar voru 9. nóvember í fyrra.

Frétt mbl.is: DV biðst afsökunar vegna Hlíðamálsins