Umferðarslys varð á Suðurlandsvegi skammt frá Hellu á öðrum tímanum í dag. Samkvæmt upplýsingum frá lögreglu er búið að loka veginum á meðan lögregla og sjúkralið athafna sig.
Óskað var eftir aðstoð Landhelgisgæslunnar sem sendi þyrlu á vettvang, en útkallið barst fyrir um 50 mínútum síðan.
Uppfært 14:26: Þyrla Gæslunnar var að lenda við Landspítalann í Fossvogi. Samkvæmt upplýsingum mbl.is var einn sjúklingur fluttur með henni.
Uppfært 14:33: Þrír voru í bifreið sem valt skammt frá söluskálanum við Landvegamót á Hellu að sögn Böðvars Bjarnasonar, slökkviliðsstjóra Brunavarna Rangárvallasýslu. Ökumaðurinn var fluttur alvarlega slasaður á Landspítalann með þyrlunni en hinir tveir, sem voru farþegar, eru minna slasaðir og voru fluttir með sjúkrabíl á sjúkrahús.
Uppfært 14:55: Suðurlandsvegur er enn lokaður skammt frá Landvegamótum vegna slyssins samkvæmt upplýsingum frá lögreglunni. Umferð verður á meðan beint um hjáleið sem liggur inn á Landveg.
Fréttin verður uppfærð.