KSÍ hefur í samstarfi við stuðningsmannasveitina Tólfuna boðið 10 stuðningsmönnum landsliðsins á leik Íslands og Englands í Nice.
Þetta kemur fram á facebooksíðu KSÍ. Þar kemur fram að KSÍ muni leggja til flug, gistingu og miða á leikinn en Tólfan sjái um að úthluta miðunum til stuðningsmanna sinna.
Tólfan hafði áður greint frá því að fjármagn sveitarinnar væri uppurið og að liðsmenn hennar væru á heimleið.
„Með þessu vill KSÍ koma til móts við stuðningsmannasveit Tólfunnar sem hefur staðið vel við bakið á íslenska landsliðinu í Frakklandi,“ segir í tilkynningu KSÍ á Facebook.